नांदेड| नाटक हे मराठी संस्कृतीचे अविभाज्य अंग असून मुंबई-पुण्यापासून वाडी-तांड्यापर्यंत प्रत्येकाने या नाट्यपरंपरेचे जतन व संवर्धन केले आहे. महाराष्ट्रातील अनेक गावांत शेकडो वर्षांची परंपरा असणारी नाट्यमंडळे हे मराठी संस्कृतीचेच द्योतक आहे, असे प्रतिपादन ललित व प्रयोगजीवी कला संकुलाचे संचालक डॉ. पृथ्वीराज तौर यांनी केले.
स्वामी रामानंद तीर्थ मराठवाडा विद्यापीठातील ललित व प्रयोगजीवी कला संकुलात मराठी रंगभूमी दिन साजरा करण्यात आला. त्यावेळी डॉ. तौर बोलत होते. त्यांनी आपल्या भाषणामध्ये मराठी रंगभूमीचा आढावा घेऊन विष्णुदास भावे ते राजकुमार तांगडे या काळातील नाटककारांचे योगदान स्पष्ट केले. रंगभूमीवरील अभिनेते, दिग्दर्शक व बॅकस्टेजचे कलावंत यांच्याही कार्याचा डॉ. तौर यांनी गौरवपूर्ण उल्लेख केला.
नाट्यशास्त्र विभागातील प्रा. अभिजीत वाघमारे यांनी रंगभूमी दिनाच्या या कार्यक्रमाचे सूत्रसंचालन केले. प्रारंभी रंगदेवता नटराजाचे पूजन करण्यात आले. त्यानंतर प्रा. राहुल गायकवाड, डॉ. अनुराधा पत्की-जोशी यांनी आपले विचार व्यक्त केले. रंगभूमी दिनाच्या या कार्यक्रमास प्रा. प्रशांत बोंपिलवार, प्रा. नामदेव बोंपिलवार, प्रा. किरण सावंत, प्रा. शिवराज शिंदे, प्रा. कैलास पुपुलवाड, निशिकांत गायकवाड, प्रकाश रगडे यांच्यासह विद्यार्थी उपस्थित होते. प्रा. किरण सावंत यांनी आभार मानले.
