4.5 रिष्टर स्केल भूकंपाचा धक्का; जिल्हाधिकारी अभिजीत राऊत यांनी केलं जनतेला आवाहन
नांदेड| आज दि. 10 जुलै 2024 रोजी 4.5 रिष्टर स्केल भूकंपाचा धक्का जाणवला. सकाळी 7.14 वा. हादरा जाणवला असून, नांदेड, हिंगोली, परभणी, वाशिमच्या काही भागात भूकंपाचा धक्का जाणवला आहे. नागरिकांनी घाबरून न जाता सतर्क रहावे असे आवाहन जिल्हाधिकारी अभिजीत राऊत यांनी केलं.
नांदेड शहर व नांदेडमधील सर्वच तालुक्यातून सकाळी 07:14 वाजता भूकंपाचे धक्के जाणवले असून या भूकंपची तीव्रता रिष्टर स्केल वर 4.5 नोंदविण्यात आलेली आहे. भूकंपचा केंद्रबिंदू हिंगोली जिल्ह्यातील कळमनुरी तालुक्यातील रामेश्वर तांडा गावात असून, नांदेड व परभणी जिल्ह्यात या भूकंपाचे धक्के जाणवले असल्याची माहिती नियंत्रण कक्षास प्राप्त झालेली आहे.
नांदेड जिल्ह्यात जाणवलेले धक्के सौम्य स्वरूपाचे असून कुठेही नुकसान झालेले नाही. तरी नागरिकांनी घाबरून न जाता सतर्क रहावे. तसेच गावात ज्या लोकांच्या घराचे छत पत्र्याचे आहे व त्यांनी पत्र्यावर आधारासाठी दगड ठेवले आहेत त्यांनी त्वरित दगड काढून घ्यावेत. असे आवाहन जिल्हाधिकारी नांदेड अभिजीत राऊत यांनी केले आहे.
