हिमायतनगर, अनिल मादसवार| अतिवृष्टीमुळे पिकांचे मोठे नुकसान होऊन शेतकरी आर्थिक संकटात सापडला असला तरीही परंपरेला साजेसा असा वृषभराजाचा पोळा हिमायतनगर शहरासह तालुक्यातील गावोगावी उत्साहात साजरा करण्यात आला.
शुक्रवार, २२ ऑगस्ट रोजी श्रावण अमावास्येनिमित्त पहाटेपासूनच शेतकऱ्यांनी आपल्या बैलजोड्यांना स्नान घालून पारंपरिक सजावट केली. वार्निश, घुंगरमाळ, मोरके, कासरे, गोंडे, झुली, नागेलीची पाने, बाशिंग अशा आकर्षक सजावटींनी सजलेले सर्जा-राजे गावोगावी दिमाखात नटले होते. महिलांनी सडा-संमार्जन करून शेतीअवजारे व पळसाच्या मेढ्याची पूजा केली.
सायंकाळी नगरपंचायतीच्या मानाच्या बैलजोडीची मिरवणूक मुख्याधिकारी सौ. पल्लवी टेमकर यांच्या पूजनाने निघाली. ढोल-ताश्यांच्या गजरात निघालेल्या या मिरवणुकीत शेतकरी मोठ्या संख्येने सहभागी झाले होते. मिरवणूक श्री परमेश्वर मंदिराचे दर्शन घेत शहरातील मुख्य रस्त्यावरून दक्षिणमुखी मारोती मंदिरापर्यंत नेण्यात आली.
यानंतर पुरोहित गजूगुरू वाळके व परमेश्वर बडवे यांच्या मधुर वाणीतील मंगलाष्टकात सायंकाळी ४ वाजून ४१ मिनिटांच्या शुभमुहूर्तावर वृषभराजाचा विवाहसोहळा पार पडला. शेतकऱ्यांनी परंपरा जपत साधेपणातही थाटामाटात पोळा साजरा केला. दुष्काळ, अतिवृष्टी आणि आर्थिक कोंडी असूनही बळीराजाने आपली परंपरा जपत आनंदाचा उत्सव साजरा केला, हे विशेष लक्षणीय ठरले.
