दिल्ली। मी मराठा समाजास आरक्षण मिळावे तसेच हा प्रश्न देशाच्या राजधानीत गांभीर्याने घ्यावा, यासाठी लाक्षणीक उपोषणास बसत आहे. अशी पोस्ट फेसबुक या सोशल मीडियावर खा हेमंत भाऊ पाटील यांनी शेअर करून दिल्ली येथील महाराष्ट्र सदन परिसरातील छत्रपती शिवाजी महाराज यांच्या पुतळ्यासमोर लक्षणीय उपोषण सुरू केले आहे.
महाराष्ट्रातील मराठवाडा भागातील हिंगोली लोकसभा मतदारसंघाचे प्रतिनिधीत्व करतो. या भागातील मराठा समाज मोठ्या प्रमाणात शेती करणारा आहे. नापीकी, वातावरणातील बदल, शेतीला मिळणारा भाव यामुळे मोठ्या प्रमाणात शेतकरी आत्महत्या होत आहेत. मराठा समाज आज अत्यंत गरीब परिस्थितीमध्ये हालाखीचे जीवन जगत आहे. बेरोजगारीमुळे गावा- गावात शेकडो तरुण वैफल्यग्रस्त जीवन जगत असून, अनेक तरुण बिन-लग्नाचे आहेत.
गेल्या सात दिवसापासून मनोज जारांगे-पाटील अन्न-पाणी त्यागुन उपोषणास बसले आहेत. त्यांच्या समर्थनार्थ गावा-गावातून युवक – महिला उपोषणास बसले आहेत. या प्रकरणाचे गांभीर्य लोकसभेच्या व्यासपिठावर मांडणे माझे कर्तव्य असून, यापूर्वी हा प्रश्न मी लोकसभेत अनेकदा उपस्थित केला आहे. या प्रश्नावर महाराष्ट्रातील सर्वपक्षिय खासदाराची बैठकही बोलवली होती. या बैठकीस २३ खासदार उपस्थित होते.
एक या प्रश्नाचे गांभीर्य दिल्लीच्या व्यासपीठावर जाणवावे यासाठी कालच मी लोकसभा अध्यक्ष श्री. ओम बिर्लाजी यांच्याकडे माझा राजीनामा दिला आहे. यावर अनेक प्रस्थापीत नेते टीका करत आहेत. मी यावर वाद-प्रतिवाद करून या प्रश्नाचे गांभीर्य घालवू इच्छित नाही. म्हणुन आज मी मौनव्रत धारण करून हे उपोषण करत आहे असे सोशल मीडियावर व्हायरल केलेल्या पोस्टमध्ये त्यांनी लिहिले आहे.
