नांदेड| लातूर विभागस्तरीय युवा महोत्सवाचे आयोजन यंदा जिल्हा क्रीडा कार्यालय नांदेडच्यावतीने नांदेड येथे दिनांक 8 डिसेंबर 2023 रोजी करण्यात आले आहे. युवक महोत्सवाअंतर्गत नांदेड, लातूर व धाराशिव जिल्हा या तिन्ही जिल्ह्याचे प्रथम, द्वितीय आलेले स्पर्धक हे विभागस्तरीय युवक महोत्सवामध्ये सहभाग घेणार आहेत. सुमारे तीनशे युवा स्पर्धक या स्पर्धेमध्ये सहभागी होणार असल्याची माहिती लातूर विभागाचे क्रीडा व युवा सेवा विभागाचे उपसंचालक जगन्नाथ लकडे यांनी दिली आहे.
या स्पर्धेचे उद्घाटन सकाळी 11 वा. शंकरराव चव्हाण प्रेक्षागृह नांदेड येथे जिल्हाधिकारी अभिजीत राऊत व विविध मान्यवरांच्या उपस्थितीमध्ये होणार आहे. त्यानंतर याच रंगमंचावर वैयक्तिक लोकगीत व समूह लोकगीत त्यानंतर वैयक्तिक व समूह लोकनृत्याची स्पर्धा भरणार आहे. या विभागस्तरीय युवा महोत्सवांमध्ये सर्व नांदेडकरांनी उपस्थिती राहून या सर्व कलाकृतींचा आनंद घ्यावा व विविध जिल्ह्यातून येणाऱ्या स्पर्धकांचा उत्साह वाढवावा, असे आवाहन लातूर विभागाचे उपसंचालक क्रीडा व युवा सेवा विभागाचे जगन्नाथ लकडे यांनी केले आहे.
मंच क्रमांक दोन म्हणजे जिल्हा क्रीडा संकुल बास्केटबॉल कोर्ट येथे संकल्पना आधारित स्पर्धा, तृणधान्य उत्पन्न वाढीसाठी विज्ञानाचा वापर व सामाजिक विकासात विज्ञानाचे योगदान या विषयास धरून प्रदर्शनी युवा कृती व विविध स्पर्धांचे आयोजन देखील करण्यात आले आहे. यासोबत युवा कृतीमध्ये हस्तकला वस्त्रोद्योग ॲग्रो प्रॉडक्ट कृषीला प्राधान्य देत युवकांमध्ये हा संदेश जाण्यासाठी युवकांना कृषी क्षेत्रात प्रवृत्त करण्यासाठी ही स्पर्धा आयोजित करण्यात आली आहे.
जिल्हा क्रीडा संकुल इंडोर हॉलमध्ये कथालेखन पोस्टर स्पर्धा व फोटोग्राफी स्पर्धा होतील. मंच क्रमांक एक वर म्हणजे शंकरराव चव्हाण प्रेक्षागृह येथे 4.30 वाजता वक्तृत्व स्पर्धा आयोजित केली आहे. त्यानंतर या सर्व स्पर्धेचा समारोप व बक्षीस वितरण सायं. 6 वाजता विविध मान्यवरांच्या उपस्थितीमध्ये संपन्न होणार आहे.
