नांदेड। सुर्यकांत रूक्माजी कावळे, वय 60 वर्षे, सध्या सेवानिवृत्त मुख्य लिपिक (वर्ग -3), श्री शिवाजी माध्यमिक व उच्च माध्यमिक विद्यालय, नांदेड. सौ.मिना भ्र. सुर्यकांत कावळे, वय 51 वर्षे, व्यवसाय – गृहीणी व शिवणकाम, दोघे रा. संकेतनगर, भावसार चौक, नांदेड यांच्याकडे बेहिशेबी मालमत्ता आढळून आल्या प्रकरणी लाचलुचपत प्रतिबंधक विभागाने दि.01/06/1999 ते दि. 07/04/2018 या कालावधीत निरीक्षण करून कायदेशीर उत्पन्नाचे तुलनेत 43.37 % किमतीची बेहिशोबी मालमत्ता आढळल्या प्रकरणी पोलीस स्टेशन भाग्यनगर, जि. नांदेड गु.र.नं. 05/2024 कलम 13(1)(ई) सह 13 (2) भ्रष्टाचार प्रतिबंध अधिनियम 1988 आणि कलम 109 भारतीय दंड संहिता अन्वये श्री कालीदास प्रभाकरराव ढवळे, पोलीस निरीक्षक, अँटी करप्शन ब्युरो नांदेड यांच्या तक्रारीवरून गुन्हा दाखल करण्यात आला आहे.
याबाबत सविस्तर वृत्त असे की, लोकसेवक सुर्यकांत रूक्माजी कावळे, सध्या सेवानिवृत्त मुख्य लिपिक (वर्ग-३) यांनी संपादित केलेल्या मालमत्तेबाबत लाचलुचपत प्रतिबंधक विभाग, नांदेड कार्यालयाकडून उघड चौकशी करण्यात आली होती. लोकसेवक यांनी संपादित केलेली मालमत्ता कायदेशीर स्त्रोताद्वारे संपादित केली किंवा कसे याबाबत त्यांना वेळोवेळी संधी देवून माहिती घेण्यात आली होती. परंतु त्यांनी संपादित केलेल्या मालमत्तेबाबत ते पुष्टीदायक पुरावे सादर करू शकले नाहीत. त्यांनी लोकसेवक पद धारण केलेल्या कालावधीत त्यांना प्राप्त असलेल्या कायदेशीर उत्पन्नापेक्षा जास्त किंमतीची मालमत्ता स्वतःचे नावे, पत्नी मिना सुर्यकांत कावळे यांच्या नावे संपादित केल्याचे उघड चौकशी अंती निष्पन्न झाले आहे.
त्यांनी संपादित केलेली रू. 23,57,086/- किंमतीची बेहिशोबी मालमत्ता ही त्यांच्या कायदेशीर उत्पन्नाच्या तुलनेत 43.37 % जास्त असल्याचे चौकशीअंती निष्पन्न झाले आहे. सदरहू विसंगत बेहिशोबी मालमत्ता संपादित करण्यासाठी लोकसेवक सुर्यकांत रूक्माजी कावळे यांना त्यांची पत्नी सौ. मिना सुर्यकांत कावळे यांनी मदत करून गुन्हयास प्रोत्साहित करून अपप्रेरणा दिली आहे. म्हणून त्या दोघांचे विरूध्द वरील प्रमाणे अपसंपदेचा गुन्हा दाखल करण्यात आला आहे.
सुर्यकांत रूक्माजी कावळे यांचे संकेत नगर, नांदेड येथील घराचे घरझडती घेतली असता एकूण 102 तोळे सोने (1किलो 20 ग्रॅम), 69 तोळे चांदी (690 ग्रॅम) व नगदी रु. 59,06,500/- ( एकोणसाठ लाख सहा हजार पाचशे रुपये ) रोख रक्कम मिळून आली आहे. ही कार्यवाही डॉ.राजकुमार शिंदे, पोलीस अधीक्षक, अँटी करप्शन ब्युरो,नांदेड परिक्षेत्र,नांदेड (मोबाईल क्र. 9623999944 ) श्री रमेशकुमार स्वामी, अपर पोलीस अधीक्षक, अँटी करप्शन ब्युरो,नांदेड परिक्षेत्र, नांदेड, श्री अश्विनीकुमार महाजन, वाचक पोलीस निरीक्षक,अँटी करप्शन ब्युरो,नांदेड परिक्षेत्र,नांदेड यांच्या मार्गदर्शनाखाली पर्यवेक्षण अधिकारी -श्री राजेंद्र पाटील, पोलीस उप अधीक्षक, अँटी करप्शन ब्युरो, नांदेड. (मोबाईल क्र. – 7350197197 ) तपास अधिकारी श्री अरविंदकुमार हिंगोले, पोलीस निरीक्षक, अँटी करप्शन ब्युरो, नांदेड यांनी केली आहे.
या कार्यवाही नंतर नांदेड जिल्ह्यातील सर्व नागरिकांना लाचलुचपत प्रतिबंधक विभागाकडून अवाहन करण्यात येते की, त्यांच्याकडे कोणत्याही शासकीय अधिकारी/कर्मचारी यांनी किंवा त्यांच्या वतीने खाजगी इसम (एजेंट)यांनी कोणतेही शासकीय काम करून देण्यासाठी कायदेशीर फी व्यतिरिक्त अन्य लाचेची मागणी करीत असल्यास तात्काळ खालील संपर्क साधावा . कार्यालय दुरध्वनी 02462-253512 टोल फ्रि क्रं. 1064.
